التسوية في مجال التمريض

 

✍️موضوع التسوية في مجال التمريض 

اللي عايز يفهم الموضوع دة يركز هنا 👇

✍️كباية الشاي و لا القهوة في ايدك وركز 

👌مبدئياً يعني ايه تسوية ؟

✍️يعني واحد اتعين بمؤهل ما ، علي درجة مالية ما ، في وظيفة ما ، و أثناء عمله بالوظيفة دي راح درس وحصل علي مؤهل أعلي من المؤهل اللي اتعين بيه.

✍️تعالو ندي مثال.

✍️واحد معاه إعدادية و اتعين عامل نظافة علي الدرجة السادسة المهنية و أثناء عمله راح خد دبلوم تجارة و لا زراعة مثلاً.

👌كدة هو خد مؤهل أعلي من المؤهل اللي اتعين بيه و بالتالي ب يتقدم بطلب لجهة عمله إنه يعمل تسوية بالمؤهل الأعلي " يعني يتغير المسمي الوظيفي بتاعه و يترقي لدرجة مالية أعلي من اللي كان عليها " 

✍️يعني هو كان عامل ف التسوية هتخلي المسمي بتاعه مثلاً فرد أمن أو كاتب مثلاً علي حسب الوظايف الخالية اللي ينفع يسوي عليها و الدرجة المالية هتبقي الرابعة الفنية لأنه خد مؤهل متوسط و هو دبلوم فني تجاري.

✍️من المثال السابق عايز اوضح شوية شروط هامة للتسوية.

١- إنك تكون أخدت المؤهل الأعلي بعد تعيينك مش قبله يعني مثلا انت معاك كلية تمريض و معهد قبل الكلية و جت جهة حكومية ما وعملت مُسابقة أو إعلان و طلبت ناس خريجين معهد فانت روحت قدمت بالمعهد و رضيت تتعين بيه يبقي ما تجيش بعد ما تستلم تقولهم سوو لي بالبكالوريوس اللي انت أصلاً واخده قبل ما تستلم عندهم.

٢- لازم يكون فيه وظيفة ودرجة مالية فاضية و موجودة و بناء عليه حضرتك هاتقدم طلب و تقول إن فيه درجة كذة فاضية و أنا معايا مؤهل يتناسب مع الوظيفة دي و عايز اسوي عليه.

٣- القانون ب يقول يجوز لجهة العمل إنها تسوي لك بمجموعة شروط - 

👌واخدين بالكم من كلمة يجوز ؟؟؟ - 👌يجوز دي يعني ساب الأمر لجهة عملك و اداها الصلاحية و التفويض إنها توافق أو ترفض طلب التسوية بتاعك - 👌يعني التسوية مش فرض أصلاً علي جهة العمل يكش تكون واخد بكالوريوس في الطاقة النووية.

٤- أهم شرط للتسوية إنك تكون واخد المؤهل الأعلي بتاعك قبل ١-١١-٢٠١٩ و دة آخر موعد نص عليه قانون الخدمة المدنية ٨١ لسنة ٢٠١٦ تحديدا المادة ٧٦ من القانون و المادة ١٨٩ من اللايحة التنفيذية للقانون و قرار مجلس الوزراء رقم ٧١٤ لسنة ٢٠١٩.

٥- دة مش كلامي أنا دة قانون الخدمة المدنية اللي بيقول كدة أي حد حصل علي مؤهل أعلي أثناء الخدمة بعد يوم ٢-١١-٢٠١٩ ملوش تسويات.

👌طيب هو ايه اللي كان ب يحصل في تمريض ؟

👌كان الزملاء ب يستلموا وظيفتهم الحكومية بالمعهد و يروحوا يدرسوا كلية حقوق أو تجارة بنظام التعليم المفتوح و بعد كدة يروحوا لجهة عملهم و يقولو لهم احنا عايزين نسيب شغل التمريض و نبقي أخصائيين شئون مالية أو قانونية و بالفعل عدد كبير كان ب يسوي لحد ٢٠١٩.

👌ودة كان ب يحصل في كل الجهات الحكومية إن أي حد ياخد مؤهل أعلي يطلب تسوية علي درجة مالية جديدة و مسمي جديد.

👌لغاية ما جه قانون الخدمة المدنية لسنة ٢٠١٦ و قال إن اللي اتعين في الحكومة علي وظيفة و رضي بيها خلاص كدة انت رضيت تتعين بمُسمّى وظيفي مُعيّن و درجة مالية مُعيّنة يبقي خلاص كدة.

👌والقانون عشان ما يظلمش الناس اللي كانت بتدرس أثناء صدور القانون ادي مُهلة ٣ سنين من ٢-١١-٢٠١٦ لحد ٢-١١-٢٠١٩

👌وصدَر قرار مجلس الوزراء رقم ٧١٤ لسنة ٢٠١٩ و قال إن اللي خد المؤهل الأعلي و عمل تسوية ياخد المرتب الأعلي لان كان فيه ناس تمريض علي الدرجة التانية و لما عملوا تسوية رجعوا علي الدرجة التالتة و لقوا المرتب أقل

👌 فمجلس الوزراء قال لا - تعمل تسوية بمرتّبك القديم لو هو أعلي أو لو الوظيفة الجديدة أعلي تاخد مرتبها.

👌خلال الفترة من ٢٠١٦ لحد ٢٠١٩ الزملاء اللي خدوا مؤهلات عليا زي تجارة أو حقوق أو تقني عملوا بالفعل تسوية في الأماكن اللي عندهم درجات مالية فاضية.

👌بعد ٢٠١٩ حتي الآن لا توجد تسويات طبقاً لنص القانون.

👌كدة القانون لغي أي تسوية بأي مؤهل بعد سنة ٢٠١٩

👌فيه شوية نقاط هامة عايز أوضحها.

👌الناس اللي كانوا واخدين دبلوم فني تمريض ٣ سنوات و خدوا معهد ملهمش تسوية لأن الإتنين ب يتعينوا علي نفس الدرجة الرابعة الفنية بس المعهد دة فوق متوسط لكن الدبلوم مؤهل متوسط و بتاع المعهد هياخد حافز أعلي.

👌بالنسبة للبرنامج التجسيري التكميلي المُعادل لشهادة المعهد دة برنامج معتمد و معترف بيه و هيبقي مؤهلك فوق متوسط مش متوسط.

👌بالنسبة للتقني بعد المعهد دة برضو برنامج معتمد من المجلس الأعلي للجامعات المصرية و بتغير بيه المسمي الوظيفي في ترخيص مزاولة المهنة من فني الي مُمارس تمريض و الناس اللي خدوا تقني قبل ٢٠١٩ عملوا تسوية و اتعينوا علي الدرجة المالية التالتة التخصصية اللي هي نفس الدرجة اللي  البكالوريوس ب يتعين عليها.

👌التقني كذلك اتفتح قدامه الباب يدرس دبلومة مدتها سنة.

👌أو زمالة مدتها ٣ سنوات

👌و بعض الجامعات فتحت قدامهم يدرسوا ماجيستير مهني.

👌وحالياً عملوا ليهم مقاصة... بعدها هاياخدوا درجة البكالوريوس في علوم التمريض ويبقي المسمى بتاعهم أخصائي مش مُمارس.

👌أهم معلومة عايز اقولها هي إن أي دراسة بعد مرحلة البكالوريوس فهي دراسة تكميلة عليا و ما ينفعش أطلب بيها تسوية أصلاً

👌لأن التسوية بتكون للمؤهل فقط

✍️متوسط اللي هو دبلوم 

✍️فوق متوسط اللي هو المعهد

✍️عالي اللي هو الليسانس أو البكالوريوس 

✍️دي المؤهلات اللي بيتم التعيين عليها في الجهاز الإداري للدولة.

👌أي دراسة تانية بعد البكالوريوس دي مش مؤهل دي دراسة تكميلية تاخد بيها حافز علي المرتب إسمه حافز التميز العلمي فقط.

✍️لكن مفيش حاجة إسمها أنا معايا دبلومة وعايز اسوي ولا زمالة و عايز أسوي و لا ماجيستير...الخ.

✍️بالنسبة للي معاه تقني لو خد زمالة أو ماجيستير مهني من حقه يروح لإدارة التراخيص الطبية بوزارة الصحة و يغير المسمي من ممارس تقني تمريض لأخصائي تمريض في التخصص اللي خد فيه الزمالة.

✍️لكن مفيش حاجة اسمها اعمل تسوية بزمالة أو ماجيستير.

👌الجهة الوحيدة في مصر اللي ب تعين بدرجة الماجيستير أو الدكتوراه هي الجامعة لو هاتتعين فيها كعضو هيئة تدريس غير كدة لا.

✍️طيب يعني نفهم من كلامك إن التقني ملوش تسوية ؟

✍️التسويات يا حضرات اتوقفت في جميع وزارات الدولة و علي كافة التخصصات و المؤهلات مش علي التقني بس.

✍️طب و الحل ايه ؟

👌الحل إن البرلمان وهو الجهة الوحيدة اللي ليها سلطة تعديل القانون إنه يعدل القانون و يسمح بالتسوية بعد سنة ٢٠١٩

أو رئيس مجلس الوزراء يقدر يغير في اللايحة التنفيذية للقانون و يصدر قرار بتعديل المادة اللي قالت انه آخر التسويات ٢٠١٩.

✍️اللي في تقني يكمل و كدة كدة هايستفيد بيه في الخاص و هايغير المسمي الوظيفي بتاعه في ترخيص المزاولة و هايستفيد بالزمالة و الماجيستير المهني في السفر 

👌وبالنسبة للتسوية اديكم عرفتوا اللي فيها.

✍️أنا عارف إني طولت عليكم بس المقال دة عملت فيه مجهود كبير في كتابته و في الحصول علي مواد القانون. الخ.

👌لو استفدت فيد غيرك.

👌ما تنسونيش من دعوة صادقة.